ШЫЩХЬЭIУМ И 1-Р ЗИ ХЭКУ КЪЭЗЫГЪЭЗЭЖА АДЫГЭХЭМ Я МАХУЭЩ
ПщIэ зыхуэсщI си лъэпкъэгъухэ, си хэкуэгъу лъапIэхэ!
Къэбэрдей-Балъкъэрым, Къэрэшей-Шэрджэсым, Адыгейм шыщхьэуIум и 1-м илъэс къэс щагъэлъапIэ Хэкум къэзыгъэзэжа адыгэхэм я махуэр. Лъэпкъым дежкIэ мыхьэнэшхуэ зиIэ а махуэмкIэ сыхуейт Дунейпсо Адыгэ Хасэм и ГъэзэщIакIуэ гупми, сэри къыдбгъэдэкIыу гурэ псэкIэ сынывохъуэхъуну.
Косовэ щIыналъэм щекIуэкIа зауэр зэрыувыIэрэ илъэс 25-рэ блэкIащ. Ауэ абы хэкIуэдэнкIэ шынагъуэ къызыщхьэщыхьэгъа ди лъэпкъэгъухэм, зэгуэр Хэкур зрагъэбгынауэ щытахэм я щIэблэм, Хэкум къагъэзэжыну я насыпым къихьащ, зэрыIыгъыу, гупышхуэу зэщIыгъуу къэкIуэжыну яхузэфIэкIащ. ХамэщI щыпсэухэр адэжь лъахэм къихьэжыну, лъэпкъыр зэрыубыдыжыну Iэмал зэрыщыIэр адыгэхэм я фIэщ зыщIа къэхъукъащIэр абы лъандэрэ лъэпкъ махуэгъэпсым хэтщ, зэдэдгъэлъапIэу, нэхъыжьхэм ди деж къахьэса фIэщхъуныгъэр имыгъэкIуасэу.
Абы щыгъуэ адыгэхэм яхузэфIэкIащ зэрызэрыIыгъыр, дэнэ щIыпIэ щымыпсэуми, зэхуэгумащIэу, зэлъэIэсу зэрыщытыр дуней псом я фIэщ ящIын. Ижь лъандэрэ лъэпкъым къыдэгъуэгурыкIуэ хабзэ дахэхэм ящыщу зыр зым дэIэпыкъуныр, зэрыхузэфIэкIкIэ щIэгъэкъуэн зэхуэхъуныр IэщIыб зэрымыхъуар, цIыху щIыкIэм къызэрыхэнар нэрылъагъу хъуат.
ПсэзэпылъхьэпIэ ихуа ди лъэпкъэгъухэр хэкужьым къэшэжыныр жылагъуэ-политикэ мыхьэнэшхуэ зиIэ Iуэхугъуэшхуэт. Урысейр хэлIыфIыхьу зэфIигъэкIа мы Iуэхум и пщIэр дунейпсо утыкум зэрыщиIэтам, и цIыхум къызэрыщыжын зэфIэкI зэрыбгъэдэлъыр къызэригъэлъэгъуам и мызакъуэу, хамэщI щыпсэу адыгэхэм хэкум къагъэзэжыну тригъэгушхуэгъат.
Ди лъэпкъэгъухэм Хэкум къезыгъэгъэзэжыр гъащIэм зиIуигъэува гугъуехь зэмылIэужьыгъуэхэм я закъуэкъым. Гум и джэ макъым едаIуэу, я адэжьхэр зэгуэр щыпсэуа лъахэр псэупIэу къыхэзыххэм я бжыгъэм хэхъуэ зэпытщ. Нобэ адэжь хэкум цIыху мини 5-м щIигъу къихьэжащ, абы и зыужьыныгъэм гуащIафIэу хуэлажьэу, я гуащIэдэкIкIэ псэуныгъэр ирагъэфIакIуэу. Къыхэзгъэщыну сыхуейт къэрал IуэхущIапIэхэм ди лъэпкъэгъухэр зыщыIущIэ лъэпощхьэпохэр щхьэщахыу, адэжь щIыналъэм щекIуэкI гъащIэм тыншу хэзэгъэжыным теухуауэ лэжьыгъэшхуэ зэрызэфIахыр.
Ди къуэшхэ, ди шыпхъухэ!
Илъэс куэдкIэ Хэкум пэIэщIэу фыпсэуа пэтми, абы къэвгъэзэжу щIэрыщIэу щыIэныгъэм зевгъэзэгъыжыну фызэрытегушхуар лIыгъэ ирокъу, къытщIэхъуэ щIэблэм дежкIи щапхъэ узыншэщ. Дэнэ щIыпIэ фыщымыпсэуами, фи адэжьхэр зэрыкIа щIыпIэхэм гурэ псэкIэ фыкъепхауэ, яхувиIэ пыщIэныгъэхэр фымыгъэкIуэду фыкъекIуэкIащ. Къапщтэмэ, нобэр къыздэсым адыгэхэр адрей лъэпкъхэм яхэмыкIуэдэжу къызэтезына щхьэусыгъуэхэм ар ящыщщ. Къэвгъэзэжа нэужьи, фи нэхъыжьхэм я хъуэпсапIэхэр нэхуапIэ фщIащ – мыбдеж унагъуэ щывухуэжащ, мамыр гъащIэми фи Iыхьэ хэфлъхьэу фыщыпсэууэ фыхуежьэжащ.
Адэжь лъахэм фыкъызэрыхуэпэжым папщIэ фIыщIэ фхузощI. Дэтхэнэми узыншагъэ, дуней мамыр, гъащIэ зэпэщ ефхьэкIыну сынывохъуэхъу, ди зэхуэдэ Хэкум и фIыгъуэ мыухыжыр псоми къытлъэIэсу дыщыIэну си гуапэщ.
СЭХЪУРОКЪУЭ Хьэутий, Дунейпсо Адыгэ Хасэм и тхьэмадэ.
1 АВГУСТА – ДЕНЬ РЕПАТРИАНТА
Уважаемые соплеменники, земляки!
От имени Исполкома Международной Черкесской Ассоциации, от себя лично сердечно поздравляю вас с Днем репатрианта.
Для адыгов (черкесов) это особая и памятная дата, которая была установлена четверть века назад в память о массовом возвращении на историческую родину группы этнических адыгов в связи с началом известной Косовской войны.
Тогда, приняв участие в сострадании и сочувствии к судьбе соплеменников, адыгский народ показал всему миру свое единство и приверженность традициям взаимопомощи и взаимоподдержки.
Деятельное и результативное участие руководства Российской Федерации в этом важнейшем общественно-политическом событии, не только способствовало повышению международного авторитета нашей страны, но и придало несомненный толчок процессу возвращения адыгов (черкесов) на землю своих отцов.
Приятно отметить, что на родину возвращаются не только те, кто попал в трудные жизненные условия. Все больше соотечественников возвращаются на родину предков по зову сердца и души. Сегодня более 5000 соотечественников, вернувшихся на родину, вносят достойный вклад в ее развитие. Органами государственной власти делается многое для того, чтобы обеспечить им благоприятные условия для успешной социальной адаптации и достойной жизни на родной земле.
Дорогие братья и сестры! Ваше решение вернуться на историческую родину после многих лет проживания вдали от родины является поистине великим и вдохновляющим поступком. Вы родились в разных уголках мира, но ваша связь с исторической родиной не ослабевала на протяжении столетий, и вы смогли сохранить самобытность и уникальность нашего народа. Возвращаясь на родину, вы осуществили мечту ваших предков — жить и трудиться на земле, которая всегда оставалась в ваших сердцах.
Спасибо вам за вашу преданность и любовь к родной земле. Желаю вам крепкого здоровья, мира и благополучия, дальнейших успехов во имя развития и процветания нашего народа и всей Отчизны!
Президент Международной Черкесской Ассоциации Хаути Сохроков
